سلوك السمك بالليل

سلوك السمك بالليل :

ساكن
وهادي واغلب السمك تقدر تلمسة بايدك وحتي تقدر تصيدة بايدك وخصوصا الصافي
والجين والعماد وتقدر تلعب مع سمك الزينة بالوانه الرائعة والشجر المرجان
والاشياء العجيبة الي ما تقدر تشوفها الا بالليل .
البالول
والهامور تشوفة كانه ميت بس من تقرب منه صار فشقة وعلشان تقدر تشوفة
بالميفرة لازم تركز نظرك داخل الميفرة لانه يكون لونة بلون الصخرة فمن
الصعب انك تشوفة علي الطاير ومرات تلقاه متعلق داخل الميفرة بس من فوق
يعني الي عليك تنزل بالارض وتطل بسقف الميفرة

الشعري
الكبير دايم تلقاه بالميفرة وبروحة وهم من الصعب انك تشوفة لان المشكلة
بالليل الالوان حقيقية والسمك دائما يتخفي بطريقة تغيير لونة بلون صخر
الميفره هم لازم تركز عدل علشان تشوفة طبعا نور الكشاف مركز بالفتحة .

الفسكرة
: الصغيرة والمتوسطة تلقاها غالبا برة الميافر ترعي وتقدر تلمسها ما تهاب
اما الكبيرة جدا جدا دائما تلقاها بالميافر وداخل الصخر الكبيرة الي قطرها
اكثر من مترين ولونها يفضحها وهشي ينتبق علي الصبيطي وخصوصا اللون الاصفر
الي بالذيل الفسكر

الخثاق : تلقاه بين مايتين او تحت بالقوع وما يحتاي صوكة علي الراس وفصل راسة عن جسمة وحطة بالمشبك

الصافي
: بما ان الصافي الكبار تارس البحر هل اليومين تقدر تلقطه بايدك او
بالمسدس او الجزة الصغيرة وراح تلق متعه وضحك بطريقة صيدة وخصوصا من كثرتة
تقول زرازير.

الينم : من كثرة ومن كثر ما يقارب مالك خلق ترميه .

أنواع الميافر

1.
في ميافر من المرجان الي تكون مثل الصحن الكبير ويكون قطرها اكثر من متر
او متشابكه وهذي قليلة السمك بس طل تحتها وتري الي تحتها السمك تكون
الفتحة الي بين الصحن والارض تقريبا شبر وسبحان الله تلاقي فيها خير لان
بين الصحن والارض حفرة تكون غزيرة نوعا ما اما الاجناب مثل ما قلت شبر
2. الميافر الي من الصخر الكبار جدا هذي تحصل كل خير فيها وخصوصا تحتها او اذا كانت فيها فتحات طل فيها وحتي اذا كانت من فوق .
3.
الميافر الي تصير بجفيف القوع او القصار وهذي مربط الفرس برطام وبالول
وهامور وشعري الخ والي لاحظته ان البالول دايم منخش بميفرة علي قدة يمكن
يكون متاهب حق الصيد
4. برة الميافر وبالرمل تلق وحر مزلقان وخوفع وخثاق ولخم وهذي الاشياء متع نظرك فيها .

اوقات الصيد بالليل .

1. الفسادة بجميع المايات من يخيم اليل الي الفجر والانسب وقت الثبر طبعا
2. الحمل ويكون اباولة او باخرة ..... واخر السجي والثبر كلة

المســـدس :

يكون
مسدس هواء ضغط اصغر حجم والحبل قصير تقريبا 100 سم لان السمك ابد مقارب
يمك والسهم هنا الكلام انا عني استعمل سهم الكبير لانه ما يخطي وسهل
التركيب بالمسدس بس بصيد البالول لازم ترميه بالراس بسهم الكبير ولا ترمية
بالذيل او البطن 75% منحاش منك تراه قوي بالمعافر مجرد لف جسمة يفلت السهم
واذا كانت الميفر سنعة ارمه بالراس وطلعة بايدك لا تسحبه من السهم لان راح
يطلع معاك السهم ارميهم فوق الراس المكان الصلب القوي و طلعهم بايدك
وبعدين حطهم بالمشبك وبعدين تسحب السهم .... وهذي الملاحظة حق جميع السمك
الكبار اول شي حط السمك بالمشبك وبعدين طلع السهم ونصيحة اذا كان هامور او
بالول جذاعي وتستعمل السهم الكابر خل الي معاك اذا كان عندة مسدس يرميه
وياك بالراس علشان تضمن انه ما يفلت .

مواصفات الكشاف

1- يكون الاحسن الي ينشحن عن طريق الكهرباء او يكون ابو 8 بطاريات او 4 كبار وحجمة كبير وقوي وهذا ما يمنع انك تغوص بكشاف اقل من كذا

2.
كشاف او ليت صغير وحجمة صغير ابو 4 بطاريات وسط ويكون سويج الفتح والاغلاق
دقمة مو فر من الغطاء وهذا الاساس لان اذا خلصت بطاريت كشافك بسهوله تكمل
غوصتك او اذا خلصت بطارية كشافك هذا يساعدك اذا طلعت اتاشر حق صاحبك الي
بالطراد عن مكانك لانك ما تضمن انك تكون مع رفيقك ودايما خله معلق بالبي
سي .

طريقة الصيد بالليل :

اول
شي الاحسن اذا كان اعداد الغواصين زوجي يكونون كل اثنين مع بعض واتجاه
مختلف واحد معاه مسدس ومشبك للسمك الكبير وطبعا كشاف والثاني كشاف وكيس
لحفظ السمك الصغير والمتوسط وفي حالة ان الي معاه المسدس رمي السمكة
الثاني علي طول يصوب الكشاف علي السمكة علشان الاول يبرز السمكة ودائما
الثاني خلف الاول للمساعدة ويكون حذر من المسدس
وطبعا
عند التنبيش بالميافر او عند صيد السمكة وتبريزها من السهم دير بالك انك
تنزل بالقاع قبل ما تشوف تحتك ___ ( القنفذ الشيت + اللخمة الصغيرة + اي
شي سام ) ولا تنسي الدسوس والبدلة الخفيفة حقت الدول .

طريقة الغوص للغواصين اذا كانو 3 وما معاهم واحد بالطراد وخل نقول اسمهم احمد + علي + نبيل
الغوصة الاولي ( احمد × علي ) الثانية ( علي × نبيل ) الثالثة ( احمد × نبيل ) وبكذا الكل خذا غوصتين
وهذي
الطريقة تضمن واحد يكون بالطراد واذا العدد زوجي سهل يكون كل اثنين غوصة
واثنين بالطراد واما اذا كان واحد بالطراد تكون العملية سهالات والوقت
قصير لانهاء رحلة الغوص .

ملاحظات للطراد اثناء الغوص :

وجود
عدد ليتين تحسبا لعطل واحد منهم ويكونون منورين ونوخذة الطراد يكون يعرف
تشغيل الطراد ورفع الباورة وسياقة الطراد وفي بعض المكاين ما يشتغلون الا
بالجوك او بطريقة ما يعرفها الي راعي الطراد ينبه الي فوق ويقولة علي
الملاحظات ....... والباورة يكون حذفها بجفة القوع لسهولة رفعها من الي
فوق الطراد وعلي الي فوق ان يحسب تقريبا 35 دقيقة وبعدين يبدا بالملاحظة
وترقب الغواصين وتنبيه عليه بعدم النوم وديرو بالكم من هل الملاحظة

وبالنهاية ليش غوص الليل :

طبعا خلونا من الصيد الي يكون غالبا احسن من صيد النهار
1. رؤية الاشياء بالوانها الحقيقية وبجمالها ورؤية القوع بشكل ثاني
2. الابتعاد عن حرارة الشمس اثناء النهار
3.
المتعة والمغامرة والماء المنعش صدقوني من غصت بالليل انا والربع كرهنا
غوص النهار وسهالات الكشاف يعطيك ضوء يكفي انك تشوف الي حواليك

» السمك الطائر
» السمك...........
» فيليه السمك